പൂന: വേശ്യാലയത്തില്‍ നടത്തിയ വന്‍ റെയ്ഡില്‍ 21 യുവതികളെ പോലീസ് രക്ഷിച്ചു. വേശ്യാലയ നടത്തിപ്പുകാരുടെ നിര്‍ബന്ധത്തിനും ഭീഷണിക്കും വഴങ്ങി വേശ്യാവൃത്തി ചെയ്തിരുന്നവരാണ് ഇവര്‍. പൂനയിലെ ഭുവനേശ്വര്‍ പെതിലുള്ള വേശ്യാലയങ്ങളിലാണ് പോലീസ് റെയ്ഡ് നടത്തിയത്. രക്ഷപ്പെടുത്തിയ യുവതികളില്‍ കുറച്ച് പേര്‍ നേപ്പാള്‍ സ്വദേശികളും കുറച്ച് പേര്‍ ബംഗ്ലാദേശ് സ്വദേശികളുമാണെന്ന് പോലീസ് വ്യക്തമാക്കി.
പ്രദേശത്തെ ചില വേശ്യാലയങ്ങളില്‍ സ്ത്രീകളെ നിര്‍ബന്ധിച്ചും ഭീഷണിപ്പെടുത്തിയും വേശ്യാവൃത്തി നടത്തുന്നതായി പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിലായിരുന്നു റെയ്ഡ്. ഞായറാഴ്ച രാത്രിയോടെയാണ് പോലീസ് സംഘം മൂന്നായി തിരിഞ്ഞ് റെയ്ഡ് നടത്തിയത്.
രക്ഷപ്പെടുത്തിയ യുവതികളെ പുനരധിവാസ കേന്ദ്രത്തിലേക്ക് മാറ്റി. യുവതികളെ വ്യഭിചാരത്തിന് നിര്‍ബന്ധിക്കുകയും ഭീഷണിപ്പെടുത്തുകയും ചെയ്ത രണ്ട് പേരെ പോലീസ് അറസ്റ്റ് ചെയ്തിട്ടുണ്ട്. സമൂഹത്തിലെ ഉന്നതര്‍ ഇവിടെ പതിവുകാരായിരുന്നുവെന്ന് വിവരമുണ്ട്.
